CONTROL DE ADSCRITOS

Auditorías externas

Tanto o Estándar Español de Xestión Forestal para a Certificación FSC como a Norma UNE 162.002 de Xestión Forestal Sostible establecen que as entidades con certificado de xestión forestal sostible deberán someterse anualmente á realización dunha auditoría externa.

A realización da auditoría segundo o sistema de certificación

Segundo o Estándar Español de Xestión Forestal para a Certificación FSC, a Entidade de Certificación que leve a cabo a auditoría inicial debe recoller as copias dos documentos e rexistros claves que serán utilizados durante a auditoría, debendo entrar en contacto con partes interesadas, de conformidade ao establecido no Estándar. Con posterioridade, deberá facer unha análise explícita da zona incluída no alcance da avaliación, en función do número de unidades de xestión forestal adscritas. A efectos da mostraxe, utilizaranse os ratios establecidos no estándar correspondente agrupando as unidades de xestión forestal en función da súa similitude. Os conxuntos seleccionaranse para minimizar a variabilidade dentro de cada conxunto en termos de:

1. Tipos de bosque (natural/seminatural ou plantación);
2. Tamaño da unidade de xestión forestal;
3. Norma aplicable.

No caso de tratarse dunha auditoría do Sistema PEFC, non se diferenciarán as unidades de xestión en función das diferentes características, senón que todas entrarán nun grupo común ao que se lle aplicará o ratio que corresponda. A Entidade de Certificación elixirá os diferentes lugares a visitar durante a auditoría de campo. A modo de exemplo, enuméranse algúns dos diferentes sitios que podería visitar.

• Hortas sementeiras e viveiros;
• Zonas protexidas;
• Zonas forestais de produción que sexan suficientemente variables (pendentes pronunciadas, diferentes condicións de solo, diferentes sistemas silvícolas, etc.);
• Servizos e instalacións dos traballadores;
• Áreas utilizadas polas comunidades locais dentro ou cerca da unidade de xestión forestal;
• Cursos de auga, tanto dentro da unidade de xestión como en cotas inferiores;
• As estradas e camiños forestais de diferentes tamaños afectados polos traballos relacionados coa unidade de xestión forestal;
• Os sitios onde se aplicou e almacenan produtos químicos;
• Os montes e áreas de alto valor de conservación;
• Os lugares de mostraxe.