GRUPO XESTIÓN FORESTAL

Deberes dos adscritos

Segundo o establecido no Procedemento de Control (SLG-PRO-01) do Grupo SELGA Xestión Forestal Sostible, os propietarios ou xestores, unha vez adscritos ao Grupo, comprométense a cumprir coas seguintes obrigas:

1. Desenvolver unha xestión forestal sostible conforme ao contido do documento técnico de xestión;
2. Manifestar por escrito á Entidade de Grupo as superficies forestais que desexen incluír en algunha das unidades de certificación de grupo que xestione a Entidade de Grupo, comprometéndose coas obrigas que impoña o sistema de certificación forestal elixido;
3. Informar á Entidade de Grupo dos aproveitamentos, tratamentos e melloras que se fagan nas superficies forestais incluídas en algunha das Unidades de Certificación de Grupo xestionadas polo Grupo SELGA Xestión Forestal Sostible;
4. Comunicar á Entidade de Grupo as modificacións realizadas sobre o planificado no instrumento de ordenación e os modelos silvícolas e, en especial, as relacionadas cos aproveitamentos e tratamentos que se executen nas superficies forestais obxecto de certificación (incluíndo calquera cambio que se produza en datos administrativos ou de identificación do propietario ou xestor);
5. Poñer a disposición, tanto da Entidade de Grupo como da Entidade de Certificación, os documentos acreditativos da xestión forestal sostible conforme cos requisitos dos sistemas baixo os que estea certificada unha determinada superficie, dando as maiores facilidades posibles para a realización das auditorías que correspondan;
6. Permitir o cumprimento, por parte da Entidade de Grupo, dos requirimentos que lle foran establecidos para dar resposta ás condicións e accións correctivas propostas e emitidas pola Entidade de Certificación ou por ela mesma;
7. Levar a cabo as accións correctivas establecidas pola Entidade de Grupo ou pola Entidade de Certificación en calquera das superficies que teña incluída nas unidades de certificación de grupo;
8. Cumprir cos requisitos establecidos polo Grupo SELGA Xestión Forestal Sostible relacionados coa promoción e venda de produtos dentro e fora do alcance dos certificados dos que o Grupo sexa titular;
9. De xeito adicional, tódolos membros do Grupo SELGA Xestión Forestal Sostible que asinen contratos coa Entidade de Grupo, independentemente do tipo de contrato, quedarán suxeitos aos requirimentos relacionados coa xestión forestal establecidos nos mesmos;
10. Coñecer e aceptar os dereitos e deberes tanto da Entidade de Grupo como dos adscritos;
11. Esixir que os traballos forestais que se executen a través de terceiros nas superficies obxecto de certificación, se fagan conforme ao manual de boas prácticas e as instrucións e condicións técnicas asumidas polo xestor;
12. Manter tódolos rexistros e documentación relacionados coa xestión forestal nas superficies adscritas;
13. Aboar as cotas ou gastos do proceso de certificación correspondente á superficie incluída nunha determinada unidade de certificación de grupo, xa sexan específicos da mesma ou a parte proporcional dos gastos xerais, debidos á administración e custodia do certificado correspondente;
14. Unha vez que unha superficie forestal sexa excluída dunha determinada unidade de certificación de grupo, e polo tanto do certificado correspondente, o seu titular non poderá facer uso do documento de Confirmación de Participación nun Certificado de Grupo de Xestión Forestal, nin de ningún outro documento que acredite a inclusión no certificado que corresponda.

Adicionalmente, os titulares de superficies incluídas dentro da Unidade de Certificación FSC, terán os seguintes deberes:

15. En tódalas superficies forestais das que o adscrito sexa xestor, aínda que non se atopen incluídas na Unidade de Certificación FSC, a xestión practicada non pode incumprir a lexislación vixente ou ir abertamente en contra dos principios da xestión forestal sostible (Principios e Criterios FSC);
16. Cumprir a corto, medio e longo prazo cos principios da xestión forestal sostible (Principios e Criterios FSC).