GRUPO CADEA DE CUSTODIA

Obxectivos do Grupo

A cadea de custodia, tanto PEFC como FSC, persegue proporcionar unha información suficiente que permita aos potenciais compradores seleccionar un produto en base a criterios de sostibilidade, así como segundo outras consideracións. Búscase garantir a trazabilidade do produto certificado dende o bosque ata o consumidor final, incluíndo todas aquelas etapas de transformación, fabricación e distribución nas que o paso á seguinte fase da cadea de subministración implique un cambio de propiedade.

Calquera cambio de propiedade na cadea de subministración require que a respectiva organización estableza un sistema de xestión de cadea de custodia e que este sistema sexa verificado por unha entidade de certificación independente, no caso de que a entidade queira facer unha declaración PEFC ou FSC sobre os seus produtos.

O desenvolvemento e execución dos sistemas de xestión de Cadea de Custodia permiten ás organizacións controlar de maneira efectiva os seus sistemas de transformación e mostrar aos consumidores a orixe dos materiais que compoñen os seus produtos.

Coa creación do Grupo SELGA Cadea de Custodia buscouse dar cumprimento a unha serie de obxectivos:

• Promocer a comercialización do produto certificado, mediante un sistema de trazabilidade que garanta a efectiva chegada do produto certificado ao consumidor final;
• Elaboralos documentos e informes necesarios que permitan a avaliación dos requisitos mínimos establecidos nas normas e estándares de certificación de cadea de custodia;
• Ofrecer a posibilidade de participar nalgún dos selos de certificación a aquelas persoas e entidades que necesiten de eses selos para unha mellor chegada ao mercado dos seus produtos, procedentes de montes xestionados de forma sostible;
• Minimizar os custos de control dos membros do Grupo SELGA Cadea de Custodia, garantindo a viabilidade económica do proceso de certificación;
• Establecer unha ferramenta de mercado que, por unha parte, achegue a madeira ao consumidor final e, por outra, permita abrir novos mercados.

Con fin de acadar estes obxectivos, SELGA, actuando na súa condición de Entidade de Grupo, creou as seguintes Unidades de Certificación de Cadea de Custodia:

• Unidade de Certificación PEFC de Cadea de Custodia; e
• Unidade de Certificación FSC de Cadea de Custodia.